„Преговорите се во тек“. Ова е единствениот одговор што јавноста го добива трет ден по ред откако официјално почнаа преговорите за влада. СДСМ денеска го испратија речиси истото соопштение од вчера во кое велат дека се во тек сериозни разговори за формирање на влада која обезбедува грижа за сите подеднакво.
Не се откриваат детали од средбата на Заев со Ахмети, а ниту од противничкиот табор не се разговорливи на таа тема. Нема детали ниту од средбата на Мицкоски со Ахмети.
Од ДУИ денеска молчат. Вчера портпаролот Османи ја демантираше информацијата дека со ВМРО-ДПМНЕ се договорени, Лазар Еленовски да биде ротирачки премиер. Рече дека тие си имаат кандидат за премиер и дека не исклучуваат ниту една партија од преговорите.
Средбата на Ахмети со Заев, според него, била конструктивна и надежна, но не и одлучувачка за успешен епилог. Најмногу се разговарало за враќање на изгубената доверба за време на изборната кампања, во која и двајцата си упатуваа остри пораки еден на друг. Најави можно решение, кое според него, би било оптимално и за граѓаните и за државата.
Алијанса за Албанците и Алтернатива по кусите средби со лидерите на македонските партии, ги ставија преговорите на почек до исходот од преговорите на ДУИ.
Далиборка Демјанска Цветановска