Да се отворат театарските сцени , за човештвото да може да просперира, апелира сопранот Ана Дурловски, примадона на нашата Национална опера и реномирана певица од светски глас, во македонската порака упатена во пресрет на 25 октомври- Светскиот ден на операта. Зад организацијата на лиферувањето на пораката стои Македонскиот центар при Интернационалниот театарски институт- УНЕСКО.
Во ова време-невреме, музичкиот театар е сведен на егзистенционален минимум, и тлее како иронична сенка, во целосна депресија. Свесни сме дека за човештвото да може да просперира, ќе мора слободно да се отворат театарските сцени, а публиката без ограничувања, да учествува во жива интеракција со отелотворените ремек дела, вели Дурловски
Возбудата и ентузијазамот и понатаму се главен двигател за остварување на мојата мисија, објаснува примадоната.
Нема поголема стимулација од онаа некому да му ги разбудиш емоциите, да му ја поттикнеш мислата, објаснува Дурловски
Не случајно се вели дека уметноста може да те издвои, но и да те соедини со светот. Затоа, во ова време на пандемија, во кое вирусот Ковид- 19 го гасне светлото на рефлекторите, повеќе од неопходна ни е комуникацијата со уметноста, со културата,низ нив да се преиспитуваме, да бидат нашата надеж, нашата иднина, додава Ана Дурловски.