Американскиот претседател Доналд Трамп изјави дека Вашингтон се обидува да ја заврши војната меѓу Украина и Русија, оценувајќи дека постои оптимизам за постигнување договор, иако признава дека процесот е покомплициран од очекуваното.
– Се обидуваме да ја завршиме таа војна, Украина и Русија. Би сакал да видам како завршува. Многу луѓе – минатата недела беше објавено дека загинале 34.000 луѓе. Војници, претежно војници. Завршив осум војни. Многу сум горд на тоа. Но, ова беше онаа за која мислев дека можеби е најлесната од сите. И се покажа дека е малку потешко, но ќе ја завршиме, изјави Трамп.
Тој нагласи дека САД се во контакт со европските партнери и дека конфликтот мора да заврши, но истовремено испрати и порака дека доколку не дојде до договор, Вашингтон има „алтернативи кои нема да бидат пријатни“.
– Имаме прекрасни авиони. Имаме нешто наречено Ф-47, сигурен сум дека не сте слушнале за него, но велат дека е фаза шест. Тоа е – велат дека е најголемата борбена машина некогаш развиена. И ќе откриеме. Ф-47. И сега е во изградба. И веќе ја имаат линијата за склопување. И ќе се справи одлично, порача американскиот претседател.
Неговите коментари доаѓаат во момент кога меѓународните напори за дипломатско решение се интензивираат, но без конкретен пробив на терен.
Паралелно, украинскиот претседател Володимир Зеленски продолжува со притисок врз регионалните актери, поставувајќи ултиматум до белорускиот лидер Александар Лукашенко да ја демонтира опремата што Киев ја смета за клучна во руските напади поставена во пограничните региони.
– На неговата територија, по должината на двата региони што граничат со Украина, има опрема што насочува оган кон украинското население. Таму има цивилно население. Во моментов немаме силна фронтовска линија таму, меѓу Украина и Белорусија, таму убиваат цивили, рече украинскиот претсдател Володимир Зеленски.
Украинската страна тврди дека таа инфраструктура се користи за насочување удари врз цивилни цели, а Киев најавува можни одговори доколку тоа не се промени ништо во дадениот рок.
– На кулите има релејни станици. Може ли да ги сруши? Која е поентата да се каже дека не сака војна? Само срушете ја таа опрема, само исклучете ја. Мислам дека една недела би му била доволна за да го направи ова. А причината зошто велам една недела е затоа што токму сега, секој ден, нашите цивили умираат, а децата се ранети поради ова. Ако тој не го стори тоа, ние ќе го сториме, порача Зеленски.
Во исто време, ситуацијата на бојното поле останува драматична. Во градот Харков најмалку едно лице загина, а повеќе се повредени во нов руски напад со наведувани бомби врз станбена зграда. Спасувачките служби извлекуваа преживеани и тела од урнатините, додека локалните власти соопштија дека меѓу повредените има и дете.
Очевидци опишуваат хаотични сцени по ударот, со делумно урнати згради и евакуација на станари. Нападот доаѓа во серија засилени руски воздушни дејства врз урбани области, кои дополнително ја влошуваат хуманитарната состојба во источна Украина.
Меѓународните напори за деескалација засега не донеле конкретен резултат, додека цивилното население и понатаму ја плаќа највисоката цена.
Александар Петрески