Француските власти значително ги засилија безбедносните мерки во пресрет на Самитот на Групата седум најразвиени економии – Г7, кој од 15 до 17 јуни ќе се одржи во туристичкиот град Евијан-ле-Бен на брегот на Женевското Езеро.
Во водите на езерото се распоредени 30 патролни пловила кои ја обезбедуваат крајбрежната зона околу хотелот „Ројал“ во рамки на луксузниот комплекс „Евијан Ресорт“, каде што ќе престојуваат светските лидери. Меѓу учесниците на самитот се очекува да биде и американскиот претседател Доналд Трамп.
За безбедноста на настанот ќе бидат ангажирани повеќе од 13.000 полицајци и припадници на жандармеријата, а посебен акцент е ставен на заштитата од потенцијални закани од беспилотни летала.
„За да се спротивставиме на заканите од беспилотни системи, располагаме со лесни и тешки системи за откривање и неутрализирање. Користиме радари, оптички и радиофреквентни сензори што овозможуваат навремено откривање на различни видови дронови, како и системи за нивно попречување“, изјави капетанот Никола Белек, командант на единицата за борба против дронови на Самитот на Г7.
Безбедносните сили демонстрираа и употреба на специјална опрема за блокирање на сигналите на беспилотни летала, додека во водите на езерото патролираат жандармериски и воени пловила. Во пристаништето се ангажирани и нуркачки тимови кои вршат дополнителни проверки на подводната инфраструктура.
Според француските власти, зоната што треба да биде заштитена е исклучително широка, поради што системите за надзор и откривање се поставени и надвор од непосредната околина на самитот.
Лидерите на земјите членки на Г7 ќе разговараат за актуелните глобални предизвици, вклучувајќи ги состојбите на Блискиот Исток, војната во Украина и светските економски нерамнотежи.
Во меѓувреме, повеќе активистички организации, меѓу кои еколошки, феминистички и антиглобалистички движења, најавија масовен протест во Евијан во пресрет на почетокот на самитот.