Кралот Чарлс III за време на државната вечера во Белата куќа ја истакна „нераскинливата врска“ меѓу САД и Обединетото Кралство, нагласувајќи дека двете земји минале долг пат од ривали до блиски сојузници.
Во присуство на претседателот Доналд Трамп, тој порача дека партнерството ќе продолжи и во иднина. Во текот на посетата, кралот оствари средба во Овалната соба и се обрати пред американскиот Конгрес што го прави втор британски монарх што го направил тоа по кралицата Елизабета II во 1991 година.
Тој нагласи дека сојузништвото „не може да се потпира само на минатите достигнувања“, особено во време на тензии околу војната во Иран и разликите меѓу Вашингтон и Лондон, вклучително и со премиерот Кир Стармер.
Чарлс III во Конгресот повика на „непоколеблива решителност“ во поддршката за Украина и ја истакна улогата на НАТО како клучен столб на безбедноста.
Тој потсети дека колективната одбрана била активирана само по нападите на 11 септември, нагласувајќи дека заедничките напори на сојузниците се неопходни за стабилност и долгорочен мир.
-Приказната за Британија и Америка е приказна за помирување од противниците до најблиските сојузници, при што можеби не секогаш се следи најправиот пат. Како што самиот рековте, господине претседателе, за време на вашата државна посета на замокот Виндзор минатата година, нашата е нераскинлива врска од историја и наследство, култура и трговија, индустрија и пронајдок. И ние сме решени заедно да се соочиме со иднината. Вечерва сме тука за да го обновиме неопходниот сојуз кој долго време е камен-темелник на просперитетот и безбедноста и за британските и за американските граѓани, изјави Кралот Чарлс III.