Пратеникот Драган Ковачки е новиот генерален секретар на ВМРО-ДПМНЕ, кој доаѓа на местото на Ѓорѓија Сајкоски. Огранизационен секретар на партијата ќе биде директорот на СОЗР, Ивица Томовски, а шеф на кабинет на партискиот претседател Христијан Мицкоски и во партијата ќе му биде Владимир Неловски, кој оваа функција ја извршува и во владата.
Централниот комитет вечерва избра и нов Извршен комитет, во кој девет лица се сменети, а на нивно место доаѓаат млади кадри. Сменети се Сергеј Попов, Олга Лозановска, Мевмет Џафери, Сашо Клековски, Миле Лефков, Маноил Јаковлевски и Ристо Симеонов, а влегуваат скопскиот градоначалник, Орце Ѓорѓиевски, пратеничката Драгана Бојковска, градоначалникот на Маврово-Ростуше, Онер Јакуповски, директорот на „8 Септември“, Синиша Стојановски, министерот Стефан Андоновски, Филип Поповски и директорот на Царина, Бобан Николовски.
Мицкоски најави дека во наредниот период ќе се изберат и нови претседатели на партиските општински комитети, како и нови раководства на Унијата на жени, Унијата на млади сили и Унијата на ветерани.
На прашањето, дали наскоро може да се очекува и реконструкција на владата, одговори дека веќе во мај, најдоцна јуни, ќе има смена во дел од ресорите во владиниот кабинет, а можеби и во некои институции.
Далиборка Демјанска Цветановска