Украинскиот претседател Володимир Зеленски денеска изјави дека назначил делегација да разговара со Вашингтон за американскиот план за запирање на војната на Русија во Украина.
Планот од 28 точки за ставање крај на агресијата на Кремљ предизвика тревога во Киев и европските престолнини, а Зеленски во петокот изјави дека неговата земја би можела да се соочи со тежок избор помеѓу застапување на своите суверени права и зачувување на американската поддршка што ѝ е потребна.
Американскиот план предвидува Украина да ѝ предаде територија на Русија, нешто што Киев постојано го отфрла, а воедно да ја намали големината на својата армија и да го блокира нејзиниот посакуван пат кон членство во НАТО.
Тој содржи многу од долгогодишните барања на Москва, а воедно да понуди ограничени безбедносни гаранции за Киев.
Украинските претставници ќе се сретнат со американска делегација во Швајцарија за да разговараат за предлогот, изјави висок функционер, откако американскиот претседател Доналд Трамп изјави дека сака Киев да одговори до следната недела.
Делегацијата ги доби сите релевантни директиви за да разговара за чекорите што водат до крај на војната, рече Зеленски во своето денешно видео обраќање.
- „Во наредните денови ќе се одржат консултации со партнерите во врска со чекорите потребни за завршување на војната. Потпишав декрет за составот на украинската делегација и ги одобрив сите релевантни директиви. Нашите претставници знаат како да ги заштитат украинските национални интереси и точно што е потребно за да се спречи Русија да изврши трета инвазија, уште еден удар врз Украина. Сега станува збор за многу повеќе од конкретни точки од еден или друг документ. Потребно е да се осигура дека никаде во Европа или во светот не преовладува принципот дека злосторствата против луѓето и човештвото, против државите и народите, можат да имаат каква било награда или прошка. Вистинскиот мир секогаш се заснова на загарантирана безбедност и правда. И ова чувство не е само мое, знам дека е чувство на милиони наши луѓе и на мнозинството луѓе во светот,“ рече украински претседател Володимир Зеленски.