Министерството за финансии соопшти дека денеска ќе биде извршена исплата на главницата и каматата за втората година од втората Граѓанска обврзница. На сметките на граѓаните ќе бидат префрлени 17,6 милиони евра главница и 880 илјади евра камата, издадени со двегодишната обврзница пласирана во ноември 2023 година со каматна стапка од 5%. Од МФ потсетуваат дека каматата за првата година беше исплатена лани, а вкупно преку двете емисии на граѓански обврзници се обезбедени 41,1 милион евра. Овој инструмент беше воведен во 2023 година со цел проширување на опциите за инвестирање и диверзификација на изворите за финансирање на економските политики. Министерството веќе работи на подготовка на проспект за нова емисија Граѓанска обврзница, по анализите на финансиските трендови на домашниот и европскиот пазар. Новата понуда ќе биде насочена кон дополнително јакнење на домашниот пазар на капитал и вклучување на што поголем број граѓани во процесот на инвестирање.
