Министерството за внатрешни работи соопшти дека и за вториот круг од локалните избори ќе користи дронови за воздушна контрола, со цел побрза реакција и навремено преземање мерки во случај на евентуални инциденти. Според МВР, во согласност со направените проценки и воспоставените планови, полицијата ќе биде присутна во близина на избирачките места и на клучните сообраќајни точки, со што ќе се обезбеди зголемена ефикасност и контрола на јавниот ред и мир. Безбедноста на граѓаните ќе биде гарантирана преку мобилни тимови, стандардна опрема и современа технологија, меѓу кои и дронови за следење на ситуацијата од воздух. Од Министерството упатија апел до сите граѓани и политички партии да придонесат за мирна и демократска изборна атмосфера, да ги почитуваат упатствата на полициските службеници и да се воздржат од какви било активности што би можеле да го нарушат изборниот процес.
