Три лица се обвинети дека краделе кабли од скопската „Железара“, при што предизвикале материјална штета од илјадници евра и пожар кој можел да има сериозни последици. Тие, во периодот од март до мај оваа година, од кругот на фабриката одзеле различни видови електрични кабли што припаѓале на „Електрани на Македонија“ и „Макстил“.
„Обвинетите, заедно и со други лица кои се уште не се идентификувани, во периодот од март до почетокот на мај годинава, од кругот на фабриката „Железара“ во Скопје, односно од објектот на „Полуконти –ИГМ“ и подземните тунели низ кои поминуваат кабли за напојување со електрична енергија одзеле повеќе километри високоенергетски и среднонапонски кабли во сопственост на оштетените правни лица АД ЕСМ – Електрани на РСМ – Подружница енергетика Скопје и МакСтил АД Скопје во вкупна вредност од околу 440.000 евра“, велат од ОЈО Скопје.
Во текот на кражбите, обвинетите користеле брусалки за сечење на каблите и потоа ги складирале за транспорт. На 9 април, поради нивното делување избувнал пожар во трафостаницата ТС Југ, со дополнителна материјална штета од над 100.000 евра и загуба од околу 60.000 евра поради прекин во дистрибуцијата на струја..
„Потоа на 6 мај, сите тројца обвинети заедно, со возило Фолксваген голф дошле до објектот и ги подготвувале каблите за транспорт. Но, при удар со кабел едниот осомничен бил повреден и тројцата отишле најпрво на Ургентниот центар „Мајка Тереза“, каде му биле констатирани повреди и му била укажана лекарска помош. Потоа сите тројца се вратиле во објектот, ги зеле алатите кои ги оставиле и се обиделе да го напуштат местото, но биле затекнати и лишени од слобода веднаш по излезот од кругот на „Железара“, велат од ОЈО Скопје.
За тројцата обвинети јавниот обвинител доставил предлог до Основниот кривичен суд Скопје да им се продолжи мерката притвор поради опасност од бегство, влијание врз сведоци и можност за повторување на делото.
Симона Петровска