Утрово од печатницата „Киро Дандаро“ во Битола започна дистрибуцијата на доверливиот изборен материјал до Општинските изборни комисии за локалните избори закажани за 19 октомври. Материјалот, кој вклучува гласачки ливчиња и Избирачки списоци, понатаму ќе се дистрибуира до Избирачките одбори, а целиот процес ќе биде обезбедуван од Министерството за внатрешни работи до денот на гласањето. Испечатени се 1.832.415 ливчиња за градоначалници и советници, како и дополнителни 474.304 ливчиња за изборите во Град Скопје. За печатење на ливчињата се предвидени 48 милиони денари, а точната потрошувачка ќе се знае по евентуалниот втор круг на изборите. Гласањето ќе почне на 18 октомври со болните и немоќни лица, затворениците и лицата во притвор, додека главниот ден за гласање е 19 октомври, кога ќе се гласа од 7 до 19 часот. Гласањето е тајно, а за идентификација ќе се користат биометриски апарати.
