Повеќе здруженија на пациенти дадоа поддршка на Унијата на здруженија на медицински сестри, техничари, акушерки и стоматолошки сестри за нивното барање медицинските сестри да бидат вклучени во работните групи на Министерството за здравство за подготовка на новиот закон што директно ја засега сестринската професија.
Од Унијата повторно го упатија барањето да имаат свој претставник во Министерството при креирањето на здравствените политики. Тие сметаат дека со донесувањето на Законот за сестринска дејност би се регулирал правниот статус на медицинските сестри, начинот на добивање лиценца, контролата на квалитетот, стручниот надзор над нивната работа, како и прекршочните одредби во случаи на несакани ситуации.
Од Министерството за здравство минатата недела соопштија дека усогласувањето на 12-те закони сè уште не е завршено, туку продолжува по етапи, со можност стручните забелешки да бидат вградени пред законските решенија да бидат пуштени во собраниска процедура.
T.Д.
