Челзи по синоќешната победа од 2:0 против Флуминенсе се пласираше во големото финале на Светското клупско првенство во фудбал што се одржува во САД. Вечерва Реал Мадрид и ПСЖ ќе се борат за влез во финалето и дуел со „сините“ за титулата светски првак.
Челси навремено инвестираше 60 милиони фунти во напаѓачот Жоао Педро од Брајтон. Бразилецот потпиша за „сините“ пред само една недела, а вчера во Њу Џерси беше херој на клубот и тоа против неговиот тим од детството Флуминенсе.
Напаѓачот ги постигна двата гола во победата на премиерлигашот и двата ги постигна на спектакуларен начин. Прво погоди од надвор од шеснаесетникот во 18-тата минута, а стави точка на победата во 56-тата, исто така, на атрактивен начин со силен удар.
Вечерва од 21 часот силите ќе ги одмерат Реал Мадрид и ПСЖ во второто полуфинале. „Кралевите“ во елиминациската фаза ги минаа Јувентус и Борусија Дортмунд со 1:0 и 3:2, додека францускиот тим беше подобар од Интер Мајами и Баерн Минхен.
Хендикеп за Реал е фактот што за овој натпревар е суспендиран Дин Хујсен, кој доби црвен картон против Дортмунд, а суспендирани кај ПСЖ се и Вилијам Пачо и Лукас Ернандез, кои беа исклучени во полуфиналето против Баерн. Разликата е тоа што Хујсен доби еден меч суспензија, додека фудбалерите на ПСЖ добија два натпревари, па европскиот шампион и ако се пласира во финалето, двајцата дефанзивци нема да може да настапат.