Јавниот долг се “спушти“ под 60%. Во првиот изборен квартал од годинава тој изнесувал 58,6% од БДП.
Мандатарот и лидер на ВМРО-ДПМНЕ, Христијан Мицковски, веќе најави ново задолжување од 1 милијарда евра, сума која предизвика бурни реакции во јавноста и отвори бројни прашања во бизнис-економските кругови… Според нив, оваа сума отвора повеќе прашања.
Едно од нив е за што ќе се трошат парите?
Официјално, деталите за овој финансиски пакет се уште не се обелоденуваат но од она што се знае е дека се работи за заем со поволни услови и дека ќе биде договорен по принципот „влада со влада“.
Според дел од познавачите ново билатерално надворешно задолжување од 1 милијарда евра не е добар чекор за македонската економија. Велат дека тоа би бил огромен дополнителен товар врз буџетот каде и како и да се потрошат тие пари, освен за враќање на старите долгови.
Со новата позајмица јавниот долг веднаш би пораснал на околу 67 отсто од БДП и тоа би ги влошило условите за идни задолжувања, но и сервисирањето на постојниот долг. Тоа би можело да го намали и постојниот, не така добар кредитен рејтинг од ББ, на нашата економија, се вели во анализата на Порталб.