Денвер ги доби двете пресметки со најдобриот тим во лигата сезонава Бостон. Утринава Нагетс славеа против Селтикс со 115-109 благодарение на уште една магична партија на Никола Јокиќ.
Српскиот центар го запиша 20-тиот трипл-дабл сезонава со 32 поени, 12 скока и 11 асистенции, а Џамал Мареј имаше 19 поени. Кај Бостон, Џејлен Браун имаше 41 поен и 14 скока, а Кристапс Порцингис запиша 24 поени и 12 скока.
Лука Дончиќ го запиша петтиот трипл-дабл по ред и тоа со најмалку 30 постигнати поени и го предводеше Далас до победа од 114-108 против Мајами. Словенецот го заврши натпреварот со 35 поени, 11 скока и 11 асистенции и стана само вториот играч во историјата на НБА со пет трипл-дабл натпревари по ред и најмалку 30 поени по Расел Вестбрук во 2017 година.
Ентони Едвардс одигра исто така фантастичен натпревар и постигна 44 поени за Минесота на гостувањето кај Индијана во победата од 113-111, а клучна беше и неговата блокада во последните моменти.
НА ОСТАНАТИТЕ НАТПРЕВАРИ
Детроит – Бруклин 118-112
Феникс – Торонто 120-113
Голден Стејт – Чикаго 122-125
Сакраменто – Сан Антонио 131-129