Владата планира да ги повлече парите кои ги даде на ЕСМ за набавка на струја од слободен пазар за покривање на евентуалните недостатоци и со тоа ќе ја покрие дупката од околу 80 милиони евра, кои планираше да ги собере од данокот за екстра профит, чие носење е заглавено во Собранието и повеќе од извесно е дека нема да се изгласа.
Овој данок требаше да опфати околу двесте компании, вклучувајќи и банки и обложувалници.
Министерот за економија, Крешник Бектеши, во Топ Тема синоќа, кажа дека ЕСМ успеало да ја покрие побарувачката за електрична енергија на домашниот пазар, и поради тоа немало потреба да се увезува струја, а парите останале неискористени.
Сепак, во изминатиот период ЕСМ, за да ги надомести потребите од струја, правеше милионски набавки на електрична енергија.
Во игра за набавка постојано се вртеа едни исти имиња на фирми, но ноќните вишоци, државните електрани ги продаваа далеку поевтино од она на берзите. Кратко се влечеше и од европската мрежа во деновите кога температурите паднаа значително под нулата.
Колку ќе чини ова се уште е непознато затоа што фактурата треба допрва да стигне.
Државата плати и повеќе од 4 милиони евра за набавка на гас за само два месеци- јануари и февруари.
Парите отидоа кај бугарската Балкан Јутилитис.