Грчките служби извлекле тело на 75-годишна македонска државјанка од морскиот дел во Неа Каликратија на Халкидики. Таа со амбулантно возило веднаш била пренесена во здравствениот центар, каде што била констатирана смрт.
„Со амбулантно возило на брзата помош 75-годишната беше пренесена во Здравствениот центар во Неа Муданија, каде што беше констатирана смртта“, информираа од грчката крајбрежна служба.
Од Крајбрежната служба на Грција соопштија дека во попладневните часови вчера, крајбрежната управа на Неа Муданија била информирана дека „75-годишна странска државјанка (државјанка на Република Северна Македонија) била извлечена без знаци на живот од морската област „Неа Каликратија“ во општина Неа Пропонтида, Халкидики“.
Од надлежната управа која ја спроведува предистражната постапка, било наредено да се изврши обдукција во Институтот за судска медицина во Солун.
