Претседателот на Украина, Володимир Зеленски, во интервју за BBC изјави дека рускиот лидер Владимир Путин „веќе ја започнал Третата светска војна“ и дека единствениот одговор е силен воен и економски притисок врз Москва.
Тој категорично ја отфрли можноста Украина да се повлече од делови на Доњецк, Херсон и Запорожје во замена за прекин на огнот, оценувајќи дека таков чекор би значел „напуштање на сопствениот народ“ и би го поделил украинското општество.
Зеленски порача дека Украина нема да загуби затоа што се бори за независност, но призна дека враќањето на границите од 1991 година е прашање на време и капацитети… Според него, Путин би искористил евентуален прекин на огнот за да се прегрупира и повторно да продолжи со агресијата во рок од неколку години.
Осврнувајќи се на односите со САД, Зеленски изјави дека без долгорочни безбедносни гаранции од Вашингтон не може да се разговара за избори или за отстапки, нагласувајќи дека „успехот за Украина значи запирање на Путин“.
