ЕУ лидерите постигнаа согласност за план за реструктуирање на економијата. Германските и италијанските лидери се залагаат за дерегулација, рестартирање на врските со Вашингтон и повеќе трговски договори. Наместо тоа, Франција го предводеше притисокот за „стратешка автономија“ – што значи блок помалку зависен од Вашингтон.
Лидерите на Европската унија постигнаа широка согласност за план за реструктуирање на економијата на блокот соочен со антагонизмот од Доналд Трамп, со тактики на сила од Кина и хибридни закани за кои е обвинета Русија. Целта на „акцискиот план“ кој ќе биде детално презентиран идниот месец е да ја направат економијата поконкурентна, вклучува мерки за координирање на надградбата на енергетските мрежи, продлабочување на финансиската интеграција и олабавување на регулативите за спојување на европските фирми.
- Притисокот и чувството на итност се огромни. А тоа може да помести планини. И беше многу јасно дека лидерите сакаат да бидат многу тесно вклучени и во брзината на испораката. Јас опишав дека мојата цел е да имаме мапа на патот што ќе ја потпишеме во март, рече Урсула фон дер Лајен, претседателка на Европската комисија.
Претседателот на Европскиот совет, Антонио Кошта, го опиша состанокот како „вистински пресвртница“.
- Овој Совет, ова повлекување беше вистинска пресвртница бидејќи сите лидери го прифатија и го усвоија предизвикот предложен од Енрико Лета да се премине од нецелосен единствен пазар на еден пазар за една Европа. Во 1992 година, преминавме од заеднички пазар на единствен пазар. А сега се движиме од единствен пазар на еден пазар. Тоа е амбициозно. Тоа значи многу работа, пред сè за ЕК, потоа за Советот и за лидерите. Но, ние го прифаќаме тоа и ја усвоивме оваа многу амбициозна цел да го заклучиме овој еден пазар до крајот на 2027 година, рече Антонио Кошта, претседател на Европскиот совет.
Францускиот претседател Емануел Макрон и германскиот канцелар Фридрих Мерц пристигнаа заедно, преминувајќи еден до друг преку подвижен мост во белгискиот замок Алден Бизен од 16 век. Но убавата слика не траеше долго и штом заврши состанокот поделбите испливаа на површина.
- Ние совршено ја знаеме оваа кореографија за еврообврзниците дека сите други скокаат на идејата. Она што е јасно е дека ни требаат повеќе иновации, ни требаат инвестиции за иновации, па затоа мора да ги финансираме, а дел од нив ќе бидат финансирани од јавни пари, па затоа е дел од техничките детали. Мојата цел е супер брзо да ја испорачам холистичката агенда за раст на конкурентноста. Поедноставување, заштита, диверзификација, инвестиции и иновации. Какви и да се техничките детали, сакам да ги испорачам супер брзо, рече Емануел Макрон, француски претседател.
- Бев многу јасен во она што го кажав, иако може да има различни мислења во тој поглед, нема да ја поддржам идејата за еврообврзници. Не сакам да го правам тоа, но дури и да бев за тоа, не можев, бидејќи Сојузниот уставен суд многу јасно стави до знаење дека постојат строги ограничувања за тоа што германската влада може да направи во тој поглед. Ние зедовме европски долг, но тоа беше во вонредни околности каде што беше дозволено, рече Фридрих Мерц, германски канцелар.
Мерц и италијанската премиерка Џорџија Мелони го предводат крилото на блокот кое повикува на дерегулација, рестартирање на односите на Европа со Вашингтон и склучување трговски договори како оној што неодамна беше постигнат со земјите од Меркосур во Јужна Америка.
Франција наместо тоа го предводи притисокот за „стратешка автономија“ – што значи блок помалку зависен од Вашингтон.
Граѓаните низ целиот блок, според последната анкета на Евробарометар се гладни за посилна ЕУ и пообединето, посилно и амбициозно лидерство во услови на воени закани, економски притисоци и климатска нестабилност.
Билјана Ставрова