Радовишката полиција поднесе кривична пријава против 40-годишен маж од село Габревци, поради сомнение за сторено кривично дело „убиство од небрежност“, откако вчера во текот на лов смртно го погодил 46-годишен маж од селото Ракитец.
Според информациите од СВР Струмица, трагедијата се случила во атарот на селото Габревци, каде 12-мина мажи биле на лов на дивеч без да поседуваат дневни дозволи. Во еден момент, сега осомничениот испукал истрел од ловечка пушка кој, поради невнимание, завршил во телото на починатиот ловџија. Куршумот го погодил во пределот на стомакот и раката.
„Повредениот бил веднаш пренесен кон Итната медицинска помош во Радовиш, но на местото „Дедински Чаири“, атар на село Дедино, лекар од службата констатирал смрт. Увид на местото извршил јавен обвинител од Основното јавно обвинителство Радовиш и екипа на ОВР Радовиш, а телото на починатиот е предадено на обдукција“, информираат од СВР Струмица.
Полицијата лишила од слобода 11 лица од селата Габревци, Ракитец, Долни Липовиќ и Дедино, Општина Конче. При претреси биле одземени ловечки пушки и муниција, вклучително и оружје пронајдено во домот на осомничениот.
Тој и уште двајца се задржани во Полициската станица Радовиш. Против ловџијата што го застрелал сограѓанинот ќе биде поднесена кривична пријава за „убиство од небрежност“, а по целосно документирање на случајот, против сите инволвирани ќе следат пријави за „незаконит лов“ по член 228 од Кривичниот закон. Против еден од членовите на групата ќе биде поднесена и дополнителна пријава за „неовластено држење и тргување со оружје или распрскувачки материи“ по член 396.
Сузана Мицева