Социјалдемократскиот сојуз на Македонија (СДСМ) бара од македонската влада да одговори дали и што е договорено во однос на прифаќањето на мигранти и отворањето на мигрантски кампови во Македонија.
По посетата на македонска делегација која деновиве беше во Лондон на Самит за Западен Балкан, од СДСМ бараат од премиерот Христијан Мицкоски да одговори дали со Британија е договорено прифаќање на мигранти и мигрантски кампови во Македонија.
За време на самитот, британскиот премиер Кир Стармер на платформата Икс напиша дека постои криминален автопат што води низ Западен Балкан, кој ги води нелегалните мигранти директно во Велика Британија.
„Нашата задача е да го затвориме и да ги разбиеме организираните шверцерски банди што го водат. Ги здружувам земјите за да се справат со овој заеднички предизвик“, напиша Стармер на Икс.
