Доналд Трамп изјави дека не сака залудна средба откако плановите за директни разговори со рускиот претседател Владимир Путин за војната во Украина беа ставени на чекање. Американскиот претседател во вторникот во Белата куќа јасно стави до знаење дека одбивањето на Москва да ги запре борбите по сегашната линија на фронтот останува клучна пречка, објави Би-би-си.
Претходно, официјален претставник на Белата куќа потврди дека нема планови Трамп и Путин да се сретнат во блиска иднина. Изјавата дојде откако Трамп минатиот четврток објави дека двајцата ќе се сретнат во Будимпешта во рок од две недели.
Шансите за самит се чини дека исчезнаа откако клучните разлики меѓу мировните предлози на САД и Русија станаа јасни оваа недела. Трамп и Путин последен пат се сретнаа во Алјаска во август, но тој брзо закажан самит не даде никакви конкретни резултати. Одлуката за одложување на новиот состанок може да се смета за обид на Белата куќа да избегне сличен исход.
„Претпоставувам дека Русите бараа премногу и на Американците им стана јасно дека за Трамп нема да има договор во Будимпешта“, изјави за Ројтерс висок европски дипломат.
Трамп во понеделникот го прифати предлогот за прекин на огнот поддржан од Киев и европските лидери, кој би го замрзнал конфликтот на сегашната фронтова линија.
„Нека престане како што е. Јас реков: запрете на фронтовската линија. Одете дома. Престанете да се борите, престанете да убивате луѓе“, истакна Трамп.