Владата да каже што ќе прави со евроинтеграциите, а партијата е подготвена за предвремени парламентарни во било кое време – порача лидерот на СДСМ. Од власта, пак, со одговор – време е за правда, а не за избори.
Во денови кога кампањата за локалните влегува во самиот финиш, а ДУИ тврди дека нема друг начин освен предвремени избори на пролет, двете најголеми партии со различни тонови.
- „Ништо не се случи изминативе година ипол дена, веќе се затвораат кластерите целосно во Црна Гора и во Албанија, многу е веројатно дека до 2029 година ќе станат земји членки на Европската унија. Владата треба да каже што ќе правиме ние. Еве, кој е следниот чекор за ние да го продолжиме патот кон евроинтеграциите?! Гледаме недоследност во изјавите на премиерот. Еднаш вели ќе има, еднаш ќе нема предвремени избори. Сметам дека тој е свесен дека толкав број на гласови и пратеници како што доби лани, никогаш повеќе нема да добие затоа што луѓето дефинитивно се освестија“, вели Венко Филипче, претседател на Социјалдемократскиот сојуз на Македонија.
Вицепремиерот и министер за транспорт, Александар Николоски тврди – следните избори ќе бидат во 2028 година. Политичките опоненти ги нарече „црна коалиција“, а најави и кои се следните чекори по завршување на локалните избори.
- „Минатата година отидоа во опозиција, само една година и три месеци се поминати откако се во опозиција и не можат да додржат да останат во опозиција. И цело време „предвремени избори, предвремени избори, предвремени избори“. Кога некој толку бара предвремени избори тоа значи дека него го интересираат само привилегиите од власта. А, овие ги интересира и криминалот од власта. После локалниве избори ние нема да се занимаваме со предвремени избори туку ќе се занимаваме со расчистување во судството и обвинителството и сите овие коишто ја злоупотребија власта од коалицијата на СДСМ, ДУИ и Левица, таканаречената „црна коалиција“ ќе одговараат по завршување на овие избори затоа што тоа е фокус број еден по завршување на изборите“, изјави Александар Николоски, вицепремиер и министер за транспорт.
Според Николоски, власта зборува за проекти наспроти манипулациите на опозицијата. Филипче, пак, даде дефинитивна оценка дека економијата е во пропаст, дека Македонија е најзадолжена земја во Западен Балкан, а 2025 е изгубена година за капиталните инвестиции.
Петар Догов
Б.С.