Индустриското производство во земјава во мај 2025 година забележало раст од 9,4% во споредба со мај минатата година, пишуваат од Државниот завод за статистика.
Најголем пораст е евидентиран во секторот за производство на електрична опрема со значајни 31,2%, како и кај производството на моторни возила, приколки и полуприколки со 21,8%. Висок раст има и во секторот рударство и вадење камен (18,8%) и кај производството на машини и уреди (18,4%).
Преработувачката индустрија, како еден од клучните столбови на економијата, бележи раст од 9%, што дополнително придонесува кон позитивниот тренд.
Од друга страна, намалување на индустриското производство е забележано кај снабдувањето со електрична енергија, гас, пареа и климатизација, со пад од 11,8%. Намалување има и кај производството на трајни производи за широка потрошувачка (–9%) и во енергетскиот сектор (–8%).
Овие податоци укажуваат на продолжување на растечкиот тренд во индустријата, со силен придонес од технолошките и извозно ориентирани сектори, и покрај падот во дел од енергетскиот сегмент.