ТФТ Скопје вечерва од 19:30 часот ќе го пречека МЗТ Скопје во рамки на третиот финален натпревар во плеј-офот во домашното кошаркарско првенство. Со победа, аеродромци ќе прослават нова титула, а тимот од Тафталиџе игра за продолжување на серијата.
МЗТ максимално го искористи домашниот паркет и славеше на првите две финални пресметки. На првата убедливо со 67-49, додека на втората гостите дадоа посилен отпор и триумфот на шампионот беше само +5. Сега, момците на тренерот Васко Атанасов имаат шанса со нова победа да ја продолжат доминацијата во домашното првенство и да дојдат до шестата титула по ред, односно вкупно 12-тата во својата историја.
ТФТ секако има свои сметки во ова финале. Веќе испиша нова клупска историја со самиот пласман во серијата за титулата, па сега ќе ја бара и првата победа. Тимот на тренерот Боро Смилковски сезонава еднаш го победи МЗТ на домашен терен во регуларниот дел од сезоната со 75-70.
МЗТ е во фантастична низа осум победи по ред во плеј-офот, бидејќи претходно со максмимални 3-0 ги елиминираше и Феникс и Куманово, па доколку слави и вечерва тоа ќе биде перфектен пат до новата шампионска титула.
Фото: Игор Паневски