Промената е усогласување на нашето законодавство со европското. Во голем број земји членки на Европската Унија не постои универзален снабдувач, домаќинствата едноставно си купуваат енергија на слободниот пазар, во оние земји каде постои универзален снабдувач, тој ја купува електричната енергија и во цената вкалкулира други трошоци кои што го има, изјави првиот човек на Регуларната комисија за енергетика (РКЕ), Марко Бислимовски во вечерашната „Топ тема“ на Телма ТВ.
„Регулаторот во регионот определува цени во Србија и Косово и досега кај нас. Доколку имаме забелешки во однос на примената, има одредени елементи со кои што знаеме да влијаеме врз цената за да зачуваме ценовна стабилност. Тоа е факторот на корекција, право кое што секогаш ќе го имаме и ќе го користиме за да избегнуваме било какви ценовни шокови“, порача Бислимовски.
Тој ги посочи и трошоците на универзалниот снабдувач.
„Во суштина, тој има трошок да набави електрична енергија. Таа електрична енергија се набавува на тендер на кој може да се јават сите трговци во државата. Потоа има трошоци за балансирање, има трошок за маржа, има трошок за маркет оператор, а универзалниот снабдувач има трошок и за закупување на мрежните активности, односно да закупи доволен преносен и дистрибутивен капацитет за електричната енергија за малите потрошувачи и за домаќинствата“, вели Бислимовски.
Во делот на реформите, посочи првиот човек на РКЕ, пред две години ги издвоиле што е снабдување, а што се мрежни активности.
„Потрошувачите добиваат издвоено што е трошок за електрична енергија, вклучувајќи ја и маржата и останатите, а што е трошок за мрежарина. Со тоа исполнивме голем дел од обврските кои што како држава ни произлегуваат од договорот за основање на енергетската заедница“, истакна Бислимовски.