Денеска во СРЦ „Кале“ во Скопје ќе се одигра кошаркарскиот Суперкуп во машка и женска конкуренција. Со овој натпревар се одбројува до почетокот на новата сезона, што стартува идниот викенд.
МЗТ Скопје против Феникс ќе атакува на третата титула по ред во кошаркарскиот Суперкуп, а вкупно шестата во историјата. Овие две екипи лани играа во финалето на Купот, кога славеа „металците“. Токму поради тоа Феникс се избори за настап во Суперкупот, бидејќи лани стигна до најголемиот успех во својата историја, а сега ќе има шанса да го освои и првиот трофеј.
Фаворит сигурно е актуелниот шампион, но во ростерот на тренерот Васко Атанасов има доста промени во играчкиот кадар, поточно во делот на странските засилувања. Домашното јадро и натаму го сочинуваат браќата Стојановски, потоа Бојан Крстевски и Дамјан Робев.
Кај Феникс сериозен проблем е повредата на младиот Андреј Митревски, кој е и капитен на тимот. Тој се повреди за време на настапот за репрезентацијата до 20 години ова лето и не е целосно подготвен за вечеррашниот натпревар од 19.30 часот.
Кошаркарската федерација на Македонија објави дека влезеот за Суперкупот е бесплатен за сите љубители на кошарката.
Во 17 часот ќе се одигра и Суперкупот во женска категорија помеѓу екипите на шампионот Баскет Кам и победникот во Купот, МЗТ Скопје.