Претседателот на Шпанската фудбалска федерација, Луис Рубиалес конечно подлегна под силниот притисок и си поднесе оставка од функцијата по големиот скандал што го предизвика по победата на Шпанија на Светското првенство за фудбалерки.
Рубиалес беше цел на силни критики од јавноста во Шпанија, но и целиот спортски свет откако за време на доделувањето на медалите ја бакна во уста Џени Ермосо. Фудбалерката потоа изјави дека бакнежот не со нејзина дозвола. Првиот човек на шпанскиот фудбал го тврдеше спротивното, а уште една црна дамка во неговото однесување беше кога по последниот свиреж на судијата во финалето славеше во свечената ложа фаќајќи се за меѓуножјето и тоа во присуство на шпанското кралско семејство.
ФИФА експресно го суспендираше на 90 денови, а по огромниот притисок од фудбалските клубови, играчите, политичарите и целата јавност во Шпанија, Рубиалес конечно се повлече.