Македонската машка кошаркарска репрезентација влегува во втората недела од подготовките за настап на претквалификациите за пласман на Олимписките игри.
Нашата селекција е дел од групата во која противници ни се домаќинот Естонија, Израел и Чешка и избраниците на селекторот Александар Јончевски ветуваат дека и со вака ослабен состав може да им се спротивстават на фаворизираните противници.
“Сите што сме тука сме дојдени да го дадеме својот максимум. А на максимален ефект ќе одиме и на турнирот во Талин. Факт е дека имаме доста ослабен тим, дека многу играчи се повредени. Но се надевам дека ќе се прикажеме во едно добро издание и дека ќе дадеме се од себе. Ние сме заедно подолго време, две-три години во оваа екипа. Добро се познаваме, доволно за да се воиграме, но сепак периодот за тоа е доста краток. Особено по еден двомесечен период на пауза од крајот на ланската сезона, малку е потешко да влезеш во ритам. Но мислам дека ќе бидеме добри. Дека ќе прикажеме добри игри”, изјави членот на националниот тим, Дамјан Робев.
ФОТО: Игор Паневски
