Говори, ветувања, многу пресечени ленти и фрлени милиони евра во ветер, но возот од Скопје до Софија никако да тргне. Најновото ветување стигна денеска, од актуелниот премиер, кој овојпат не пресече лента, но заедно со неговиот привремен бугарски колега, официјално ја почна изградбата на источниот дел од железничкиот Коридор 8, секција Куманово – Бељаковце – Крива Паланка.
Донев порача дека Коридорот 8 е важен за сите три земји, како за Бугарија, така и за Албанија и Македонија и дека без сомнеж ќе придонесе за додадена вредност на развојот на целиот регион.
Ветување дека, овојпат на работата ѝ се гледа крајот, дадоа и министерот Бочварски и директорот на Македонски железници.
Пругата почна да се гради во 1994-та година. Активностите беа прекинати по неколку години. Процените се дека тогаш во ветер отишле околу 100 милиони евра. Потоа владата на Никола Груевски ги продолжи активностите во 2014 година, па повторно ги запре, за истото ветување да го даде и Зоран Заев.
Сега изградбата на овој дел од пругата е доверена на компанијата „Штрабаг“, а на делот од Бељаковце до Крива Паланка на компанијата „Ѓуљермак“.
Договорот со „Штрабаг“ тежи 40,5 милиони евра, а договорот со „Ѓулермак“ вреди 155 милиони евра.
Далиборка Демјанска Цветановска