„Досега сме набавиле имаме договори околи 300 000 тони јаглен од Грција, цената се движеше околу 55 до 62 евра , во зависност од калоричната вредност. Тоа е јаглен со слични карактеристики и подобри од нашите, затоа што нашите рудници се во завршна фаза. Нашиот квалитет се движи околу 1350 килокалории, нивните се над 1650 до 1800-тини. Денеска договаравме за наредните 12 месеци, да имаме испорака по отприлика 80 000 тони јаглен на месечно ниво, примарно за потребите на РЕК Битола, но дел од количините може да бидат користени и во РЕК Осломеј. Тоа значи дека за 12 месеци треба да обезбедиме околу 1 милион тони јаглен, по цена која ќе биде конкурентна“ изјави во вечерашната Топ Тема, генералниот директор на ЕСМ, Васко Ковачевски.
Според Ковачевски, добавувачите на јаглен кои го носат од Грција, превозот го вршеле за околу 15 евра а сега е околу 25 евра од тон. Значително е зголемен заради зголемувањето на цената на горивата, на дизелот, додаде тој.
Во однос на цената на мазутот тој објасни дека таа е регулирана од Регулаторната комисија за енергетика и по таа цена се купува мазутот.
„Кога објавуваме јавна набавка за набавка на мазут, фиксирана е цената, по цена која ќе ја одреди регулаторната комисија за енергетика. Да потсетам дека ние на крајот на февруари, почетокот на март, склучивме договор за набавка на мазут, за 144 000 тони и таа набавка и испорака трае заклучно со октомври. Денеска разговаравме за количини кои ќе бидат потребни од ноември до крајот на април, значи 7 месеци и негде месечно нас ќе ни требаат околу 30 до 35 илјади тони, значи вкупно 250 000 тони мазут додека трае грејната сезона. Тој мазут ќе биде најмногу потребен, негде 80 до 90 проценти за термоелектраната во Неготино, но исто така дел од количините ќе бидат потребни и за во Битола и Осломеј, како техничка поддршка при старт на котлите и одржување на работните температури“ – кажа за Топ Тема, првиот човек на ЕСМ.