Макс Ферстапен триумфираше на трката за Големата награда на Саудиска Арабија во Формула 1 шампионатот по фантастична борба со Шарл Леклер.
Актуелниот светски шампион дојде до првата позиција во директен дуел со Лекер во последните 10 круга. Возачите на Ферари и Ред Бул во неколку наврати се менуваа на лидерската позиција, но Ферстапен го направи клучното претекнување на два круга до крајот и ја задржа првата позиција за да дојде до триумфот. Третото место му припадна на Карлос Сајнц од Ферари, додека освојувачот на пол-позицијата Серхио Перез мораше да се задоволи со 4.место.
Џорџ Расел од Мерцедес беше петти, а бодови освоија и Естебан Окон, Ландо Норис, Пјер Гасли, Кевин Магнусен и Луис Хамилтон.
Во генералниот пласман Леклер е лидер со 45 бодови, пред тимскиот колега Сајнц, кој има 33, Ферстапен со денешната победа има 25 на 3.место.
Следната трка во Формула 1 шампионатот се вози за Големата награда на Австралија на 10 април.