И сестрата на Бесмира Ејупи, несудената конзулка во Њујорка заработувала хонорарно во Државното правобранителство, покажуваат податоците на Отворени финансии.
Фатиме Ејупи за две години во 14 наврати добила по околу 20 илјади денари по трансакција или вкупно заработила околу 4.200 евра до Државното правобранителство. Сестрата Бесмира пак која на затворена владина седница првин беше назначена за конзул во Њујорк, па потоа отповикана од истото правобранителство заработила околу 4 илјади евра.
Двете сестри не работеле само во една државна институција, туку во повеќе па така Бесмира била ангажирана хонорарно и во општините Чаир, Сарај, Брвеница и Петровец додека Фатиме Ејупи лани во декември добила илјада евра хонорар од Државната изборна комисија и уште околу 4 илјади денари од УЈП во повеќе ситни трансакции.
Во државното правобранителство, освен двете сестри Ејупи, хонорари земала и ќерката на Андријана Сливоска, генералната секретарка на Државното правобранителство. Помладата Сливоска во 12 трансакции подигнала над 4.400 евра од институцијата која треба да се грижи и да ги штити државните интереси и парите на граѓаните.
Кога се јавивме во правобранителство, на неколку телефонски повици никој не одговори, но потоа ни се јави еден маж кој рече дека сите жени се на 8-мартовска прослава, но ни посочи локал за да ја побараме генералната секретарка Андријана Сливоска. Таа ни се јави, потврди дека и нејзината ќерка и сестрата на конзулката Бесмира Ејупи биле ангажирани хонорарно, но ни рече да бараме информации официјално.
Генералната секретарка Сливоска ни рече дека Фатмира Ејупи била ангажирана како помлад соработник за човечки ресурси, додека нејзината ќерка Катерина била за одржување контакти со правобранителства на други држави. Биле ангажирани хонорарно законски поради потреби на институцијата која немала финансиска согласност за вработување, ни кажа генералниот секретар на Правобранителството.,
Миомир Серафиновиќ