Министерот Бочварски најави дека првиот комерцијален лет од Скопје за Софија ќе биде изведен на 11-ти февруари за што се согласила туристичката компанија Гуливер. Планот за редовна линија меѓу двата главни града кои се оддалечени 174 километри по воздух е – од март, но ќе се утврдува на состанокот на двете државни комисии за инфраструктура после премиерниот авионски лет.
Летот нема да носи обични патници туку ќе ги качи само македонската и бугарската делегација од ресорните министри за трансорт и туроператори од двете држави.
– На 11 февруари во Скопје ќе организираме заедничка средба со туроператорите од Северна Македонија, каде што очекувам да се најдат сите поволности и можности и најдобри солуции за граѓаните, за да во иднина оваа линија биде операбилна и да може да оперира редовно на релација Софија – Скопје и секако уште една дестинација која ќе биде дополнителна можност за граѓаните, изјави министерот за транспорт и врски Благој Бочварски при денешната посета на Кочани.
Прашан кога ќе профункционира редовната авиолинија Бочварски посочи дека постои можност за во текот на следниот месец, укажувајќи дека предлозите околу оперирањето на авиолинијата ќе бидат разгледани на средбата на 11 февруари.
-Очекувам на средбата во Скопје на 11 февруари туроператорите кои имаат најдобри сознанија во однос на сите овие постапки и на можностите кои ќе се понудат од нивна страна веројатно можноста е на почетокот, односно во текот на март да се отвори таа редовна авиолинија. Но сепак, пак ќе кажам, очекувам тоа да произлезе од страна на искусните, професионалците, туроператорите од двете земји, кои ќе ги дадат можностите и ќе дадат свои предлози, каде е најпотребно да оперира оваа авиолинија освен на релацијата Скопје – Софија и водејќи се од тие сознанија секако дека ќе донесеме одлука што ќе биде од интерес на граѓаните, рече Бочварски.