Сточарството во Малешевсклиот регион веќе изумира, но има жени кои се уште не дозволуваат да го снема производството на брендираните малешевско сирење и јагне. Една од нив е Вангелина Пармачка од беровското село Будинарци, која рамо до рамо со нејзиниот сопруг и вработениот овчар работи на бачилото, но и произведуваат сточна храна. Вангелина е една од десетте жени сточарки во Малешевијата, која произведува органско и квалитетено сирење, а може да се вкуси во беровските ресторани и хотели или да се купи директно од нив. Таа е носител на земјоделското стопанство, а овој период имаат и дополнително работа во фармата.
Семејството Пармачки имаат околу 600 овци, очекуваат за Велигден на пазарот да понудат околу 500 јагниња. Во сточарството и производството на малешевското сирење нема одмор, Вангелина вели се мора да биде точно и во одреден час, но и да се внимава на хигиената во млекарата. Дополнително се грижи и за финансиите, но и за аплицирање за субвенции и грантови. Таа ги пофали вработените од подрачната едницина на ресорното министерство и од Федерацијата на фармери, кои им помагаат. Но, смета дека државата мора повеќе да им понуди сточарите, бидејќи имаат потреба од модернизација на фармите, но и да ги задоволат европските стандарди.
Имаа доставено барање до Агенцијата за храна и ветеринатство нивното органско малешевско сирење да се најде и во продавниците низ земјава. Во моментов најголем проблем на сточарите им е обезбедувањето на сточната храна, чија цена е зголемена.
Семејството на Вангелина Пармачка овците ги одгледува во преубавата и живописна Малешевија, која изобилува со пасишта, а вкусот на сирење е посебно од овој регион. Според оваа сточарка, мајка, но и носител на земјоделското стопанство за да се привлечат жените да останат да работат во оваа гранка потребно е да се изборат за бенефицирани стаж.
Сторија на Викторија Јованова