-Во тек е постапка на утврдување на работни места кои не се неопходни за производството на електрична енергија во одреден временски период. Извршителите на утврдените работни места ќе бидат упатени на принуден одмор не подолг од три месеци, согласно согласно Законот за работни односи, со исплата на 70% од платата, објавија од Електрани на Северна Македонија.
Објаснувањето на ЕСМ е дека воведува мерки на штедење со цел намалување на трошоците во услови на енергетска криза. Мерките се насочени во правец на намалување на непродуктивните трошоци и реализација на производниот процес со вложување што помалку материјални и човечки ресурси.
Претходно, фотографија од повикот до раководители за правење списоци за принуден одмор беше објавена на повеќе медиуми, па ЕСМ издаде соопштение. Исто така Електрани објави дека се намалени и други трошоци.
-Намалени или целосно запрени се и сите други трошоци, односно стопирани се спонзорствата, репрезентациите, службените патувања кои не се строго поврзани со производството на електрична енергија, сведена е на неопходниот минимум исплатата на прекувремени работни часови, додека законската дневница за патување се исплаќа во половина износ. Запрена е набавката на возила, освен возила потребни за производниот процес, додека употребата на патнички возила е целосно и строго рационализирана, соопштија од ЕСМ.
ЕСМ е најголем снабдувач со струја на ЕВН Хоме која ги снабдува домаќинствата. Поради големата енергетска криза и намалено исполнување на потребите за електрична енергија, цената на струја од производство на ЕСМ беше покачена од 36,1 на 41 евро за мегават/час.