Инфлацијата во еврозоната е во постојан раст. Цените во септември годинава биле за 3,4% повисоки во споредба со истиот месец лани, соопшти Евростат. Тоа значи највисока инфлација во последните 13 години.
Особено зголемување на цените во септември има кај енергијата, која е за цели 17,6% поскапа отколку во септември 2020 година. Цените на индустриските добра пораснале за 2,1%, а животните намирници чинеле 2% повеќе отколку пред една година. Услугите, пак, бележат зголемување од 1,7%.
Европската централна банка прави напори инфлацијата среднорочно да изнесува околу 2%. Според Европската Банка, сегашниот раст на инфлацијата е само привремен и се должи на многу посебни услови, од кои најголем дел се поврзани со пандемијата. Стравот на фирмите и потрошувачите од висока инфлација би можел и натаму да влијае врз зголемување на инфлацијата, се оценува во нова студија на Германскиот институт за економски истражувања Такво зголемување последен пат е забележано во времето на првата нафтена криза во октомври 1974 година.