Финска ја совлада Данска со минимални 1-0 во рамки на натпреварот од Групата Б на Европското прнвество.
Данците очигледно се` уште беа во шок по она што му се случи на Кристијан Ериксен пред крајот на првото полувреме. Фудбалерот на Интер колабираше на теренот на стадионот „Паркен“ во Копенхаген. Брзо реагираше капитенот на данската репрезентација Симон Кјаер, кој му укажа прва помош пред да дојдат медицинските лица.
Лекарите по повеќе од 15 минути помош успеаa да го повратат фудбалерот на Данска. Беше изнесен на носилки и пренесен во најблиската болница, а официјалните информации се дека Ериксен се чувствува добро и е во стабилна состојба.
По еден час пауза натпреварот продолжи по барање на фудбалерите на двете репрезентации. Данска можеби доминираше и имаше шанси, но победата ја однесе Финска буквално со единствениот удар кон голот на противникот.
Херој на Финците беше Џоел Појанпало во 60.минута. Пјер Емил Хојбер не реализираше пенал за Данска во 74.минута од натпреварот.