Државата има обезбедено пари за воведување нов начин на гласање. Министерството за финансии позитивно одговори на барањето на ДИК да се обезбедат пари за хардвер, софтвер, терминали, обуки и други алатки неопходни за проверка на идентитетот на гласачот преку отисок од прст.
Проценките на ДИК, направени врз основа на разговори со домашни и меѓународни експерти, се дека оваа новина во гласањето ќе чини 300 милиони денари. Оваа недела, вели претседателот Александар Даштевски, ќе се одржи средба со МВР, која е единствената институција што има база на податоци со отисоците од прсти. Министерството ќе треба тие податоци да ги внесе во електронските избирачки списоци и да ги направи употребливи за техничката опрема што ќе се наоѓа на секое избирачко место. Даштевски верува дека има време за реализација на оваа нова законска обврска.
Локалните избори треба да се одржат во октомври. Наместо спреј и уве ламба, секој избирач ќе биде проверен со посебна техничка опрема која треба да покаже дали лицето има право на глас, дали се наоѓа во избирачкиот список и дали веќе гласало на друго место. Терминалите ќе алармираат за секое несовпаѓање на личните податоци, фотографиите и отисоците од показалец, кои се депонираат во МВР при апликацијата за лична карта.
Соња Николовска
