Покрај компанијата Фајзер, уште еден производител на вакцини против ковид најави доцнење во испораката на вакцините за ЕУ. Од Астра Зенека соопштија дека нема да можат навреме да ги достават бараните количини, поради проблеми во производството. Неофицијално, испораките ќе бидат намалени за 60%. „АстраЗенека“ требаше да испорача 80 милиони дози на 27 земји членки на ЕУ до март, но сега се очекува таа бројка да биде 31 милион. Вакцината на „АстраЗенека“, развиена со Универзитетот Оксфорд, сè уште не е одобрена од Европската агенција за лекови, но се очекува зелено светло до крајот на месецов. Од ЕК изразија длабоко незадоволство во врска со оваа информација. Во своето соопштение до Астра Зенека инсистираат на прецизен план за испорака врз чија основа земјите-членки можат да ги испланираат своите кампањи за вакцинација, доколку вакцината добие дозвола за употреба. Минатата недела „Фајзер“ веќе најави доцнење во дистрибуцијата на своите вакцини наменети за ЕУ поради модификација на производствениот процес.
