Македонската женска кошаркарска репрезентација почна со подготовките за настап на двата квалификациски натпревари за пласман на Европското првенство што ќе се одиграат во Рига.
Избраничките на селекторот Владимир Ѓоровиќ тренираат во Охрид, а во следниве денови се очекува на колешките од националниот тим да им се приклучат уште неколку кошаркарки кои имаат обврски кон своите клубови.
“Дојдовме во Охрид со намера да одработиме најдобро што можеме во оваа недела која е пред нас. Од голема корист е што ќе ни се приклучат Митрашиновиќ, Николиќ и Бонер. Се надевам дека со нив три, ќе го подигнеме нивото на тренинзи. И дека по одработената недела во Охрид, атмосферата на тренинзите ќе ја пренесеме и на теренот, односно на натпреварите во Рига. Но пред сè, најважно ни е да останеме здрави сите. И со една цел – победа”, изјави за веб страницата на КФСМ, Нена Трајчевска.
Нашите кошаркарки во Охрид ќе тренираат до осми ноември, а потоа заминуваат за Летонија каде ќе ги одиграат натпреварите против Хрватска и Германија.
