Соединетите Американски Држави и Израел извршија координирани напади врз Иран, таргетирајќи ја канцеларијата на врховниот лидер, претседателската палата во Техеран и воени објекти низ земјата.
Претседателот Доналд Трамп потврди дека започнале „големи борбени операции“ и ја повика иранската јавност да ја преземе контролата над владата, нагласувајќи дека ова е „можеби единствената шанса за генерации“.
– Војската на Соединетите Американски Држави презема масовна и тековна операција за да спречи оваа многу злобна, радикална диктатура да им се заканува на Америка и на нашите основни интереси за национална безбедност. Ќе ги уништиме нивните ракети и ќе ја срамниме со земја нивната ракетна индустрија. Таа повторно ќе биде целосно уништена. Ќе ја уништиме нивната морнарица. Ќе се погрижиме терористичките посредници во регионот повеќе да не можат да го дестабилизираат регионот или светот и да ги напаѓаат нашите сили, изјави американскиот претседател Доналд Трамп.
Иран веднаш возврати со ракетни удари кон Израел, а експлозии се регистрирани и во Катар, Обединетите Арапски Емирати, Кувајт и Бахреин, каде што беше погодена американската морнаричка база на Петтата флота.
– Во последните месеци, тираните во Иран планираат да ги обноват своите нуклеарни и ракетни капацитети и да ги закопаат под земја, каде што нема да можеме да ги удриме. Ако не ги запреме сега, тие ќе станат неранливи. За таа цел, нивните претставници во преговорите се обидуваат да купат време, обидувајќи се да купат време во неплодни и измамнички преговори со нашите американски пријатели, изјави израелскиот премиер Бенјамин Нетанјаху.
Во Техеран, по ударите избувнаа големи пожари, се забележуваат уништени автомобили и густ чад над станбени згради и локални продавници.
Во серијата напади погодено е училиште за девојчиња во јужниот регион Минеб, провинцијата Хормозган, каде локалните власти бројат жртви, а неофицијално станува збор за над 40 загинати и 48 повредени. Во Иран на сила е целосен прекин на интернетот.
Дел од експертската јавност пак смета дека користењето само на воздухопловните сили против Иран нема да биде доволно за соборување на режимот, освен ако САД всушност не успеат да го добијат на своја страна иранскиот народ и делови од сегашната влада.
– Мислам дека за неколку дена ќе имаме одговор на едно од клучните прашања „дали знаат што прават“ – дали успеале да го уништат режимот до степен што владеењето на режимот е загрозено, а раководството е обезглавено – тоа е нешто што треба да го знаеме за неколку дена, без разлика дали го ставиле тој дел од операцијата под контрола или не. Ако, знаете, во рок од една недела не се ослободат од режимот, режимот е сè уште таму, војската е сè уште лојална и иранскиот народ не се кренал, тогаш мислам дека можеме да кажеме дека не ја завршиле својата подготвителна работа, вели професорот по стратешки студии на Универзитетот Сент Ендрус, Филипс О’Брајан.
Министер за надворешни работи на Иран, Абас Арагчи, истакна дека земјата ќе ги користи „сите одбранбени и воени капацитети под легитимното право на самоодбрана“ и упати апел до соседните држави да не дозволуваат нивните територии да се користат за напади врз Иран.
Александар Петрески