Министерството за дигитална трансформација ќе иницира јавна расправа за можната регулација на пристапот на малолетници до социјалните мрежи, најави министерот Стефан Андоновски, посочувајќи дека строгата забрана не е едноставно решение и отвора сериозни дилеми.
„Забраната звучи наједноставно, но носи два предизвици – технички и правен. Ако родителот му купи телефон на свое име на детето, државата не може да знае кој го користи. Акаунтот може да биде лажно деклариран како за лице над 18 години или да се користи VPN пристап“, изјави Андоновски.
Според него, ограничувањето на пристапот отвора и прашања за границите на државната интервенција во приватната сфера.
„Ако државата почне да забранува содржини во домашната сфера на граѓаните, каде е границата – дали утре ќе забрануваме и телевизии?“, праша министерот.
Андоновски нагласи дека ставот на министерството од почетокот бил фокус на едукација наместо рестрикции. Министерот предупреди дека целосна забрана тешко може да биде ефикасна.
„Искрено, мислам дека со забрани нема да ја постигнеме целта за побезбеден интернет. Тоа е трка меѓу мачка и глушец. Како кај нелегалното онлајн коцкање – постојано се отвораат нови апликации и државата трча по нив. Ниту еден министер во светот не може да гарантира 100% забрана, дури и во авторитарни режими“, изјави Андоновски.
Тој посочи дека постои генерациски јаз меѓу наставниците, родителите и децата во однос на користењето на дигиталните алатки и дека институциите имаат обврска да помогнат во препознавање на ризиците.
Т.Д.