Обилните врнежи од дожд ја излеаја Зајашка Река од коритото и поплавија дел од населбите во Кичево. Повеќе од 200 жители се евакуирани и привремено сместени во спортската сала „Христо Узунов“. Жителите вознемиени велат дека водата уште од рано утрината почнала да ги поплавува нивните домови.
„Нема ниту еден дом што не е поплавен. За жал страна на општинските органи никој не е излезен на терен. Се однесуваат како да не се случува ништо и ние да не сме жители на Кичево. Се снаоѓаме сами како можеме“
„Се е уништено. Немаме веќе ништо. Ги молам сите надлежни да ни помогнат затоа што останавме на улица“
„Таму не се живее веќе. Не може ниту да се влезе во домовите, не пак да се седи таму. Едвај со багери не извадија од домовите“, велат жителите.
Поплавени се и подрумски простории во повеќе објекти, како и болницата во Кичево. Екипите од Црвениот крст обезбедиле ќебиња, душеци, топол оброк и вода за евакуираните.
„Нема повредени. Сите семејства што се покрај течението на реката се евакуирани. Но, очекуваме во текот на денот бројот на евакуирани да се зголеми до 230 луѓе“, кажаа од Црвен крст.
Градоначалникот на Кичево, Александар Јовановски во разговор за Телма алармира дека состојбата е сериозна и побара помош од надлежните министерства и институции. Тврди дека веднаш реагирале со сите раположливи капацитети.
Во Кичево состојбата е најкритична, но поплави има и во гостиварско, каде мајка и две деца беа заглавени во куќа и навреме спасени од службите. Пријави за поплави има и во Скопје и Тетово.
Соопштение од Центарот за управување со кризи:
Во Скопски регион: Поплавени дворни места во Општина Гази Баба, Општина Сарај, Општина Зелениково и Општина Бутел.
Тетовски регион: Свлечиште на патот Тетово – Ѓермо, сообраќајот во прекин.
Гостиварски регион: Поплавени куќи во Гостивар (Беловиште, Циглана, Бањечница) и затрупан канал во Балиндол.
Од УХМР предупредуваат дека постои опасност од ново излевање на реките и поплави низ Македонија.
Тамара Марковска