Дојави за наводно поставени бомби во повеќе основни училишта во Куманово пристигнале попладнево, информира раководителот на секторот за образование во Општина Куманово, Александар Јовановиќ. Од таму додаваат дека учениците биле безбедно евакуирани.
„Дојавата за бомба е испратена по електронски пат, нешто по 17 часот. Од училиштата повикале полиција која мошне бргу пристигнала, учениците безбедно се евакуирани. Останува на службите да ја проверат состојбата“, изјави раководителот на секторот за образование Александар Јовановиќ.
Секторот за внатрешни работи Куманово потврди дека се пристигнати пораки за поставени експлозивни направи во неколку основни училишта.
„Денеска околу 18 часот во СВР Скопје и СВР Куманово пријавено е дека на е-адресите во неколку основни училишта пристигнати се пораки за поставени експлозивни направи во училишта. Во тек се проверки од страна на полициски службеници“, соопшти СВР Куманово.
