Потпишан е меѓудржавен договор за авиосообраќајот меѓу Македонија и Британија. Договорот во Лондон го потпишаа британскиот министер за воздухопловство Кир Матер и министерот за транспорт Александар Николоски.
Како што соопшти министерството за транспорт, договорот ја отвора можноста за воспоставување на нови директни авиолинии меѓу двете земји, а со тоа и зголемување на бројот на туристи од Велика Британија.
Договорот е потпишан на иницијатива на Велика Британија и претставува нова правна рамка со која се уредуваат односите во делот на редовниот воздушен сообраќај меѓу двете земји, соопшти министерството.
Додават и дека преку договорот се овозможува поголема слобода и флексибилност на авиокомпаниите, ефикасно работење и нови услуги, додека за патниците се овозможуваат подобри конекции, нови дестинации и конкуретни цени.
Со договорот се уредува и интермодалниот превоз, што е особено важен дел во карго транспорот, а, исто така, се постигнува и висок степен на заштита и безбедност на авиокомпаниите и патниците утвредни преку ИКАО стандардите, пишува во соопштението на министерството за транспорт.