Учениците од основното училиште „Вера Циривири Трена“ во Општина Карпош веќе неколку дена следат настава без основни услови за работа, без парно греење, реагираат дел од родителите.
Според нивните реакции кои ги споделија со телевизија Телма, децата седат во студени училници, облечени со јакни што, пак, како што велат, сериозно влијае врз нивната концентрација и здравје.
Проблемот, според извори на Телма, трае веќе неколку дена и сè уште не е јасно кога ќе биде решен, a во обид да најдеме одговор од управата на училиштето никој не одговори на нашите повици.
Телевизија Телма се обрати и до Општина Карпош од каде велат дека се запознати со проблемот, но тврдат дека проблемот не е со парното, туку со електричната инсталација. Поради често паѓање на осигурачите од електричната мрежа, котелот постојано се исклучува. Велат и дека во моментов таму има распоредено екипи кои работат на санирање на дефектот.
