Општината треба да биде инвеститор за планирање и изработка на урбанистички планови, а не приватни инвеститори и тоа ќе го направиме преку Одделение во јавното претпријатие, изјави Невена Георгиевска, кандидатка за градоначалничка на Општина Карпош од група избирачи, во вечерашната „Топ тема“ на Телма ТВ.
„Една од првите работи ќе биде ревизија на секторот урбанизам и секторот за инспекција. Затоа што сме воочиле огромни недостатоци во секторот урбанизам во изминатите години и во однос на издавање на дозволи таму каде што не смее, значи каде што нема детални урбанистички планови. Сите зборуваат што сака да слушне народот, меѓутоа во позадина сосема друго се случува“, рече Георгиевска.
Во вечерашната дебата во „Топ тема“ беа поканети сите пет кандидати за градоначалник на Карпош, учеството го откажа Сотир Лукровски, кандидат на коалицијата „Твоја Македонија“ предводена од ВМРО-ДПМНЕ, со објаснување „со обврски со партиски митинг“ и „претходно договорени настапи на други телевизии“.
С.Д.
