Државите членки на НАТО, во усвоена Декларација на самитот во Хаг, се обврзаа во наредните 10 години да издвојуваат по 5 отсто од националните буџети за одбрана на Алијансата. Од нив, 3,5 отсто ќе се однесуваат на основна одбрана, односно оружје и трупи, а 1,5 отсто ќе претставува износ кој е предвиден за т.н. безбедносни инвестиции, како што се заштита на критичната инфраструктура, иновации, обезбедување на цивилна заштита, итн.
Потврдена е и цврстата посветеност на колективната одбрана, како што е содржано и во Членот 5 – напад на една држава членка се смета за напад на сите членки на Алијансата.
Во Декларацијата се споменува и „Русија како долгорочна закана по европската безбедност“, но за разлика од ланската, овојпат не се споменува војната во Украина.
Самитот на НАТО се одржува во сенка на кревкото примирје меѓу Израел и Иран, по 12-дневните интензивни воздушни удари меѓу двете земји на Блискиот Исток.
