Шпанија ја победи Франција со 5-4 и ќе игра против Португалија во големото финале во Лигата на нации.
Синоќа во Штутгарт имаше вистинска голеада. Се чинеше дека „црвената фурија“ го има целосно мечот под контрола до самиот финиш. Шпанија во 55-тата минута веќе имаше водство од 4-0 благодарение на головите на Нико Вилијамс, Микел Мерино, Ламин Јамал од Пенал и Педри.
Килијан Мбапе од пенал намали на 4-1, но Јамал со својот втор погодок на натпреварот во 67-та минута зголеми на 5-1. Тогаш Франција се разбуди, а најмногу заради влегувањето на Рајан Шерки. Играчот на Лион, кој е пред трансфер во Манчестер сити постигна прекрасен гол за 5-2. Вивијан си постигна автогол, а Рандал Коло Муани во третата минута од судиското продолжение погоди за конечни 5-4.
Шпанија во недела во Минхен од 21 часот ќе игра против Португалија во финалето на Лигата на нации, додека во Штутгарт истиот ден од 15 часот, Германија и Франција ќе играат за 3.место.